MedicAlert er alþjóðlegt neyðarþjónustukerfi sem er rekið án ágóða og víða í sjálfboðavinnu.

Kerfið er þríþætt:

• Áletrað merki til að bera um úlnlið, háls eða annars staðar á sér.  Á merkinu eru upplýsingar um sjúkdóm, ofnæmi eða annað sem þarf að vita varðandi skyndihjálp. Auk þess er neyðarsímanúmer og auðkenninúmer eiganda.
   
• Plastspjald í kreditkortastærð með frekari upplýsingum, m.a. nöfnum og símanúmerum aðstandenda og lækna.
   
• Enn ýtarlegri upplýsingar, sem eru varðveittar í tölvu á Slysa- og bráðadeild Landspítalans, þar sem svarað er gjaldfrjálst í neyðarsíma MedicAlert allan sólarhringinn.

MedicAlert á Íslandi er deild í alþjóðasamtökunum MedicAlert Foundation International. Höfuðstöðvarnar eru í Californíu í BNA, en stærstu deildirnar utan BNA eru í Canada, Englandi, Ástralíu, Nýja-Sjálandi og Suður-Afríku. Merkisberar eru í yfir 40 löndum.

Ný stjórn Medicalert var skipuð á aðalfundi 13. Apríl s.l.

1. Á aðalfundi  sem haldinn var 13. apríl s.l.  voru kynntar breytinga á stjórn MA að hálfu Lionshreyfingarinnar. Nýr formaður er Lúðvík Andresson, félagi í Lionsklúbbnum Tý, og nýr gjaldkeri er Guðjón Jónsson félagi í Lionsklúbbi Seltjarnarness.  Ritari stjórnar er áfram Guðmundur Bjarnason, félagi í Lionsklúbbnum Víðarri.  Af hálfu aðildarfélaganna eru áfram í stjórn þau Svava Aradóttir frá FAAS - Félag aðstandandenda Alzheimerssjúklinga og frá SÍBS Thelma Grímsdóttir.
    
2. Varamenn í stjórn, tilnefndir af Lionshreyfingunni eru Kristín Þorfinnsdóttir Lkl. Emblu, Jón Bjarni Þorsteinsson, Lkl. Mosfellsbæjar og Ómar Þorsteinsson, Lkl. Kópavogs.  Áfram sitja í stjórn þau Ásta Dís Guðjónsdóttir frá Sjálfsbjörgu og Rúrik Kristjánsson frá Hjartaheillum.  Þá var greint frá því að MedicAlert fulltrúar Lionsumdæmanna, A og B, eru þeir Geir Hauksson, Lkl. Hafnarfjarðar og Vigfús Gíslason, Lkl. Ólafsvíkur.  Aðrar breytingar eru ekki á stjórn að þessu sinni.
    
3. Trúnaðarlæknar.   Magnús B. Einarson og Björn Guðmundsson sem verið hafa trúnaðarlæknar samtakanna muni gegna því þýðingarmikla starfi áfram.  Þeir eiga miklar þakkir skildar fyrir fórnfúst starf í þágu MA.
    
4. Styrkur frá Actavis.  Formaður greindi frá fundi sem stjórnin, ásamt fyrrverandi formanni, átti með fulltrúum Actavis.  Var erindi fundarins beiðni um áframhaldandi stuðning fyrirtækisins við MA. Svar hefur nú borist þar sem heitið er styrk að upphæð kr. 200.000.- á ári í þrjú ár.  Auk þess var boðið upp á kynningu á MA fyrir starfsfólk fyrirtækisins og loforð um að standa straum af stofnkostnaði fyrir þá starfsmenn sem kynnu að þurfa á merki að halda.  Formaður hefur þegar sent þakkarbréf til Actavis fyrir þetta höfðinglega boð.
    
5. Í maí s.l. var farið yfir upplýsingar um fjölda merkisbera og nýskráningar s.l. ár og það sem af er þessu ári.  Merkisberar frá upphafi munu vera 5.135  Af þeim eru nú 895 látnir og samkvæmt því 4.240 virkir merkisberar.  S.l. ár greiddu 409 einstaklingar árgjald og árið þar áður 276 eða 133 nýir greiðendur árgjalds.  Nokkuð er um einstaklinga sem ekki greiða árgjald, bæði börn og þeir sem ekki telja sig hafa fjárhagslega getu og er ekki gengið hart fram með innheimtuaðgerðir.  Samkvæmt upplýsingum frá skrifstofunni um nýskráningar mun þær hafa verið 174 á s.l. ári eða nokkru fleiri en þeir sem greiddu árgjaldið og það sem af er þessu ári hafa komið 75 nýir merkisberar.
    
6. Hvað er framundan.  Eftirfarandi  verkefni  þarf  að leggja áherslu á.  Meiri kynning á hlutverki MA, dreifing bæklinga í apótek, heilsugæslustöðvar, læknastöðvar og að senda öllum Lionsklúbbum nýtt bréf með ósk um samstarf og þátttöku í kynningarverkefni.  Virkja betur aðildarfélögin, heimsíður þeirra og blaðaútgáfu.  .  Kanna þarf áhuga hjá félögum eldri borgara á samstarfi við MA.
    
7. Samstarfsaðilar, fjölgun, sýnileiki.   Ræða þarf  um nánara samband við þessa aðila, kynningu og fela þeim hlutverk við dreifingu upplýsinga um MA.
    
8. Heimasíðan og breytingar á henni. Hugmyndin er að finna  einhvern „tölvuglöggan“ Lionsmann til að taka að sér umsjón með síðunni.  Gott væri að heyra ef einhvere af okkar félagsmönnum hefði áhuga á að hjálpa okkur í þessu verkefni að uppfæra heimasíðuna reglulega.
    
9. Áletrun á merki.  Rætt var um nauðsyn þess að leita að nýjum aðila til að annast áletrun á merkin með Magnúsi Steingrímssyni.  Magnús hefur sinnt þessu verki mörg undanfarin ár af mikilli trúmennsku og vandvirkni en vart hægt að ætla þetta verk einu manni.  Auk þess er sá búnaður sem samtökin eiga og notaður er til að grafa á merkin orðinn gamall og slitinn.  Rætt var um hugsanlegt útboð á verkefninu en einnig að ræða við þá aðila sem vitað er að eiga svona búnað og hafa e.t.v. tengsl við samtökin eða Lionshreyfinguna..  Í framhaldi af því var talað um að láta á það reyna með formlegum hætti hvort hægt væri að fá niðurfelld gjöld við innflutning merkjanna. Ný tölvutengd graftrarvél kostar um 1.5 milljónir króna sem við ráðum ekki við nema að fá sérstaka styrki fyrir slíkum kaupum.
    
10. Nánara samstarf við Lionsklúbbana.  Við leitum eftir nánari samstarfi við alla Lionsklúbbana í landinu. Stjórn Mediaalert mun  skrifa öllum formönnum Lionsklúbbanna svipað bréf og gert var á s.l. ári og hvetja til fræðslu um MA.  Semja þyrfti við einstaka klúbba um að annast dreifingu kynningarbæklingsins á heilsugæslustöðvar og apótek á klúbbsvæðum.  Einnig rætt um hlutverk og skipun sérstakra Lionsfulltrúa í klúbbunum svo og hlutverk MA fulltrúa Lionsumdæmanna og hvort hægt væri að fá svæðisstjóra og umdæmisstjóra til að ræða um MA á fundaferðum sínum um landið.
     
11. Ný stjórn MedicAlert biður alla Lionsfélaga sem hafa einhverjar uppástungur eða ábendingar um hvað betur má fara hjá okkur að hafa samband .

Við vonumst eftir miklu og góðu samstarfi við Lionsklúbbana og sækjumst eftir aðstoð við reksturinn á MedicAlert sem Lionshreyfingin hefur nú séð um rekstur á í 25 ár með góðum árangri.

Eldra efni, fréttir og tilkynningar,  sjá  hér.

MedicAlert á Íslandi
Sóltúni 20
105 Reykjavík
Sími 533 4567
Netfang:  medicalert@medicalert.is
Veffang:  www.medicalert.is

Afgreiðslutími er virka daga kl. 10 - kl. 12.

Grafísk hönnun:  Gunnar Steinn Valgarðsson